Rekordstor tildeling av spelemidlar til Kvinnherad

Publisert 18. juni 2021 , Oppdatert 18. juni 2021

Richard Erlandsen i Halsnøy IL er synleg stolt over kva dei har fått til, og med god grunn. Her gjerast ingen forskjell på heime- eller bortelag. Med nytt klubbhus på over 600 kvm er det topp moderne og skikkelege fasilitetar for både medlemmer og besøkjande hjå Halsnøy IL. No kan dei snart få avslutta ei kostbar forskotering av spelemidlane. Bilete: Kristian Helgesen

Hovudutval for kultur, idrett og integrering i Vestland fylke har fordelt årets spelemidlar. Vestland er fylket som får nest mest i landet, og Kvinnherad får ei særs høg tildeling i år, med over 9 millionar slik det går fram av heimesidene til Vestland fylkeskommune.

Kvinnherad kommune kan gle seg over det store engasjementet hjå innbyggjarane som innhaldet i tabellen viser. Med årets tildeling er endeleg dei siste spelemidlane til Rosendal friidrettsstadion på plass. Både Strand-Ulv og Halsnøy IL har gjennomført store kostnadskrevjande prosjekt. Gledeleg er det også at det er stor ulikskap i dei prosjekta som omsøkjast frå Kvinnherad.

Alt dette hadde likevel ikkje vore mogleg, hadde det ikkje vore for eldsjelene vi er berika med i kommunen. I godt samvirke med andre lokale institusjonar og økonomiske bidragsytarar syt dei stadig for at alle innbyggjarane og besøkande kan nyte godt av engasjementet deira.

Sjå søkjarar og tilrådingar

Ordinære anlegg	Søkjar	Tilråding
Rosendal idrettsanlegg, friidrett	Kvinnherad kommune	1 500 000
Strand-Ulv-hallen, sandvolleyballhall	IL Strand-Ulv	1 000 000
Halsnøy idrettslag, klubbhus	Halsnøy idrettslag	2 947 000
Skarveland skule Erslandsparken kunstgrasbane	Kvinnherad kommune	1 500 000
Husnes idrettspark, lagerbygg/garasje	Kvinnherad kommune	1 000 000
Rosendal utandørs ridebane med lys	Rosendal rideklubb	672 000
Tveitadalen skisenter, lysløype rehabilitering	Idrettslaget Ternen	307 000
Heio idrettsanlegg, garderobe	Uskedal idrettslag	avslag
Rosendal idrettsanlegg, speakerbu og sanitær	Rosendal turnlag	avslag
Rosendal idrettsanlegg, lagerbygg	Rosendal turnlag	avslag
Hattebergfossen rundt, tursti	Kvinnherad kommune	avslag
Borvika sanitæranlegg	Kvinnherad kommune	avslag
Kvinnherad arena, håndballhall	Kvinnherad kommune	avslag
Kvinnherad arena, klatrevegg	Kvinnherad kommune	avslag
Kvinnherad arena, basishall	Kvinnherad kommune	avslag
Kvinnherad arena, 60 m løpebane	Kvinnherad kommune	avslag
Kvinnherad arena, aktivitetssal	Kvinnherad kommune	avslag
Kvinnherad arena, buldreanlegg	Kvinnherad kommune	avslag

Nærmiljøanlegg	søkjar	Tilråding
Bringedalsbygda skule ballbinge	Kvinnherad kommune	118 000
Rosendal idretts- og fritidspark, lysanlegg	Rosendal idretts- og fritidspark	avslag

I tabellen er det ei rekkje søknadar som har fått «avslag». Det kunne likegodt stått «utsett». Ein spelemiddelsøknad på ordinære anlegg ligg gjerne inne i 3-4 år før han får tildeling. Ein av årsakane til at Kvinnherad kjem ekstra godt ut av det i år, er det store søknadsvolumet som ligg inne herifrå no, mellom anna spelemiddelsøknadane på Kvinnherad arena (vel 30 millionar)

Det kan difor vere gunstig å ligge inne med ein spelemiddelsøknad no dei neste to åra, spesielt på nærmiljøanlegg.

Samstundes registrerer kommunen at talet på søknadar på nærmiljøanlegg er synkande. Denne ordninga er særleg gunstig for dei små anlegga. Her er det høgare prioritet på tildeling, og inntil 50 % finansiering. I Kvinnherad er det fleire gode døme på nærmiljøanlegg; til dømes «apejungelen» i Rosendal, finansiert opp mellom anna av 4-5 spelemiddelsøknadar; ballbingen, skatepark, og sjølve apejungelen. No dei siste to åra er det attpåtil omsøkt spelemidlar til rehabilitering av ballbingen og nytt lysanlegg.

Når ein søkjer spelemidlar, blir rekneskapen også grunnlag for å søkje særskild ordning på momsrefusjon idrettsanlegg. Dei siste to åra har det vore 100 % refusjon på dei som søkte frå Kvinnherad.

Alle som har vore i ein slik søknadsprosess, veit at det stillast strenge krav. Samstundes er dette eit kvalitetsstempel; dei anlegga som blir finansiert over spelemiddelordninga har vore gjennom ei grundig vurdering, både hjå dei frivillige, konsulentar, entreprenørar og myndigheter. Midlane skal nyttast til anlegg for idrett, friluftsliv og fysisk aktivitet, også med omsyn til mellom anna medverknad, behovsvurdering og universell utforming.

Frå Vestland fylkeskommune si heimeside

Spelemidlane er overskot frå Norsk Tipping, og blir fordelt etter ein lengre søknadsprosess. Det er fylkeskommunen som forvaltar og tildeler spelemidlane.

Ventetida for å få spelemidlar har auka dei siste åra. Når ikkje summen fylket får frå Kulturdepartementet dekkjer ein større del av søknadane, blir etterslepet stort. Slik det er no må søkjarar vente i gjennomsnitt 4,7 år før dei får pengar til ordinære anlegg. For nærmiljøanlegg er ventetida i gjennomsnitt 2,3 år.

Hovudutvalet vedtok difor å sende ei uttale til Kulturdepartementet om utfordringane i spelemiddelordninga.

– Spelemiddelordninga er komplisert og har ei rekke utfordringar, blant anna den lange ventetida. No må fleire lag og organisasjonar å betale store summar i renteutgifter fordi dei forskutterar spelemidlane gjennom lån. Vi ønskjer å redusere ventetida, og sørgje for at kommunar, idrettslag og andre i fylket raskare får pengar til å realisere anlegga sine og for å redusere kostnadane, seier Stian Davies, leiar for hovudutval for kultur, idrett og integrering.

Søk

Sjå søkjarar og tilrådingar

Frå Vestland fylkeskommune si heimeside